Riçard Morninqstar Bunu Bakıda səfərdə olan ABŞ Dövlət Departamentinin Avrasiya enerji məsələləri üzrə xüsusi elçisi Riçard Morninqstar iyunun 1-də jurnalistlərin suallarını cavablandırarkən deyib.
O, «Nabucco» qaz kəməri məsələsinə toxunarkən bildirib ki, ABŞ Cənub dəhlizi layihələrini dəstəkləyir.
Riçard Morninqstar Birləşmiş Ştatların Azərbaycanın qaz ehtiyatlarının məhz Cənub dəhlizi vasitəsilə Avropa bazarlarına daşınmasını istədiklərini deyib:
«Biz inanırıq ki, «Nabucco» həm siyasi, həm strateji nöqteyi-nəzərdən çox böyük önəm daşıyan layihədir. Lakin kommersiya reallıqları hansı kəmərin tikiləcəyini müəyyənləşdirəcək».
ABŞ diplomatı prezident İlham Əliyevlə keçirdiyi görüşdən də məmnun qalıb, görüşdə bir sıra məsələlərin müzakirə olunduğunu bildirib:
«Amerika radiolarının gələcək aqibəti barədə xüsusi olaraq danışmadıq, lakin cənab prezidentlə çox məhsuldar görüş keçirdik və müxtəlif məsələləri müzakirə etdik. ABŞ və Azərbaycan arasında əlaqələr çox mühüm əhəmiyyət kəsb edir. Həm bizim prezident, həm dövlət katibi ABŞ-la Azərbaycanın münasibətlərinə böyük önəm verir».
