ABŞ: "Rusiyanın Ukraynaya qoşun yeritməsi "ağır səhv" olardı"

-

YANUKOVYCH PREZİDENT SEÇKİSİNƏ RAZILAŞDI

Ukrayna prezidenti Viktor Yanukovich elan edib ki, Ukrayna vaxtından qabaq prezident seçkiləri keçirəcək.

Yanukovich həmçinin Ukraynanın 2004-cü ilin konstitusiyasına qayıtmasını da elan edib.

Bu konstitusiya prezidentin səlahiyyətlərini azaldır.

Yanukovich milli birlik hökuməti yaratmağa başladığını da bildirib.

Müstəqillik Meydanında dinc mitinq davam edir:

KİYEVDƏ AZƏRBAYCANLI İTKİN DÜŞÜB

Ukraynanın paytaxtı Kiyevdə baş verən hadisələr zamanı bir azərbaycanlı itkin düşüb.

Birləşmiş Ukrayna Azərbaycanlıları Konqresinin (BUAK) sədri Rövşən Tağıyev APA-ya bildirib ki, həmin şəxs əslən Bakının Hövsan qəsəbəsindən olan, 1987-ci il təvəllüdlü Ukrayna vətəndaşı Mustafayev Teymur Əli oğludur.

R. Tağıyev bildirib ki, Teymurun ailəsi Kiyevdə yaşasa da, özü Ukraynanın Volın vilayətinin Turçin şəhərində yaşayır: “Fevralın 19-da Turçindən Kiyevə anasının yanına gəlib və axşam saatlarında evdən çıxarkən anasına Maydana getdiyini, Kiyevə də elə bu məqsədlə gəldiyini bildirib. Həmin gecə səhərə qədər evə gəlməyib və fevralın 20-də səhər Maydanda baş verən atışma və partlayışlardan sonra onunla əlaqə kəsilib, mobil telefonu söndürülüb və yaxın dost-tanışından da heç kimin artıq onu görmədiyi bildirilib”.

R. Tağıyev T. Mustafayevin tapılması üçün Daxili İşlər Nazirliyinə, Ukrayna Təhlükəsizlik Xidmətinə, ərazi üzrə yerli milis bölmələrinə, o cümlədən müxalifətin Maydandakı qərargahına müraciət olunduğunu söyləyib.

-

UKRAYNADA MÜXALİFƏTLƏ İQTİDAR RAZILAŞDI

Ukrayna prezidentinin mətbuat xidməti bildirir ki, razılaşma Prezident Viktor Yanukovich, müxalifət və AB nazirlərinin ötən gecəki danışıqlarından sonra əldə edilib.

Rusiyalı vasitəçi Vladimir Lukin də məlumatlara görə, danışıqlara qatılıb. Bəyanatda deyilir ki, razılaşma Avropa vaxtıyla saat 10-da imzalanacaq, ancaq detallar açıqlanmır.

Müxalifət və AB nazirləri razılaşmanın əldə olunduğunu dərhal təsdiqləməyib. Polşanın xarici işlər naziri Radoslaw Sikorski bu səhər tvitterində yazıb ki, “bütün gecə aparılan danışıqlardan sonra, danışıqlar başa çatıb”, detallara varmayıb.

TƏRƏFLƏR GİROVLARI AZAD EDİRLƏR

AzadlıqRadiosu Ukrayna xidmətinin məlumatına görə danışıqlar nəticəsində etirazçıların həbs etdiyi Daxili qoşunların 67 əsgəri azad olunub. Avromaydanda yaradılmış canlı dəhlizdən keçən əsgərlər avtobuslara minib meydanı tərk edəndə bir qrup etirazçı onların qarşısını kəsib "amnistiyanın" əleyhinə olduqlarını deyiblər. Bildiriblər ki, bu əsgərləri polisin həbs etdiyi etirazçılarla dəyişmək lazımdır. Millət vəkilləri Petro Poroshenko, İgor Shvayka və digərləri onları dilə tutanda aralarında mübahisə yaranıb. Etirazçılar millət vəkillərinə irad tutublar ki, polis güllərləri altında onlardan heç kim görünməyib və hazırda qərar verməyə haqqları yoxdur. Avromaydan fəalları işə qarışıb tərslik edən yoldaşlarını dilə tutublar. Bundan sonra əsgərlər avtobuslarda meydanı tərk edib. Xəbər verilir ki, güc strukturları da ötən gün ərzində həbs etdikləri etirazçıları azad ediblər.

_{Avromaydanın tvvitterində girovların azad olunmasından bir foto}