AzadlıqRadiosunun ünvanına yeni ittihamlar səslənir
Bir sıra mətbuat orqanlarında istintaq orqanına istinadən AzadlıqRadisonun guya çirkli pulların yuyulması və mənimsənilməsində şübhəli bilinməsi barədə məlumalarla bağlı bildirmək istəyirik ki, radio fəaliyyəti dövründə tam şəkildə şəffaf işləmiş, vergi və digər sosial müdafiə xərclərini vaxtlı-vaxtında ödəyib. Bu baxımdan da radionun çirkli pulların yuyulmasında və mənimsənilməsində ittiham edilməsi və bunun Rusiya mediyasına sızdırılması istintaq orqanının qeyri-obyektiv və qərzəli olması ilə bağlı mövqeymizi bir daha təsdiq edir və gücləndirir.
Radiojurnalistikanın faəliyyəti ilə az-çox tanış olanlar bilir ki, istintaq orqanının yaydığı xəbərdə göstərilmiş məbləğlər böyük işçi heyətinə malik olan radio əməkdaşlarının aylıq əmək haqqını, ofisin kirayə xərcləri və digər zəruri təchizat xərclərini qarşılamaq üçün böyük məbləğ deyil.
Digər tərəfdən, istintaq orqanı radionun şahid qismində dindirdiyi bütün əməkdaşlarına istintaq sirrini təşkil edən məlumatların yayılmasının yolverilməzliyi haqda xəbərdarlıq edib, iltizama qol çəkdirsə də, özü qanunsuz olaraq bu sirri təşkil edən məlumatları birtərəfli qaydada yaymaqla, əslində istintaqın bir daha qeyri-obyektiv olduğunu və yönünü müəyyən edib.
Dekabrın 29-da “İnterfaks-Azərbaycan” agentliyi istintaqa yaxın mənbələrə istinadla AzadlıqRadiosuna qarşı “çirkli pulların yuyulması” ittihamı irəli sürüldüyünü yazıb. Agentliyin xəbərinə görə artıq dekabrın 20-də “AzadlıqRadiosu”nun bank hesabına həbs qoyulub. Dekabrın 26-da isə radionun yerləşdiyi binada axtarış aparılıb:
““AzadlıqRadiosu”nun fəaliyyəti ilə bağlı bir sıra şahidlər dindirilib. Onlardan biri, Şahvələd Namazov öz ifadəsində bildirib ki, o, “Fərqli düşüncə” qəzetinin təsisçisidir. Qəzet 2009-cu ildə “AzadlıqRadiosu”nun saytında yayılan materialların dərc edilməsi məqsədi ilə yaradılıb.
Müqaviləyə görə, “AzadlıqRadiosu” qəzetin hər nömrəsinə görə onun bank hesabına 900 manat, 2011-ci ilin oktybar ayının sonundan etibarən 1300 manat köçürməyə başlayıb. Qəzet həftəlik qəzet olub və bəzən ayda 1-2 dəfə işıq üzü görüb. Qəzet 2014-cü ilin may ayına qədər dərc edilib və pulsuz paylanıb.
“Hazrda “AzadlıqRadiosu”nun fəaliyyəti araşdırılır və istintaq zamanı artıq bir necə ciddi qanun pozuntusu faktı aşkarlanıb. İstintaq orqanları radionun çirkli pulların yuyulmasında iştirak etməsindən və bu pulların bir hissəsini mənimsəməsindən şübhələnir.”
Məlumatda adı çəkilən jurnalist Şahvələd Çobanoğlu da bildirir ki, onun AzadlıqRadiosu ilə əməkdaşlığında və “Fərqli Düşüncə” qəzetinin çapında hər hansı qanunsuz bir əməl yoxdur:
“Qəzet qanuni şəkildə fəaliyyət göstərib, qanuni şəkildə qeydiyyatdan keçib, vergilər ödənilib, nüsxələri də pulsuz şəkildə paylanıb. İndi Azərbaycan hakimiyyəti prokurorluğun əli ilə qanun çərçivəsində bir işi cinayət kimi qələmə verir.
Əslində isə bizi məhz elə fərqli düşündüyümüzə görə cəzalandırmaq istəyirlər. Bu, eləcə də AzadlıqRadiosu əməkdaşlarının istintaqa çəkilməsi, ofisinin möhürlənməsi ölkədə söz və media azadlığına basqıdan başqa bir şey deyil.”
AzadlıqRadiosunda axtarışla bağlı radionun hüquqşünaslarının rəyi
Dekabrın 26-da AzadlıqRadiosunun Bakıdakı ofisində Azərbaycan Respublikası Baş prokurorluğunun Ağır cinayətlərə dair işlər üzrə istintaq idarəsinin apardığı araşdırma, sənədlərinin müsadirə olunması, və əməkdaşların istintaqa cəlb edilmələri barədə radionun hüquqşünaslarının rəyi:
Əvvəla, AzadlıqRadiosunun Bakı bürosunun ofisində həyata keçirilmiş axtarış və götürmə istintaq hərəkəti qanunsuz və əsassız olub. Belə ki, axtarış və götürməni sanksiyalaşdıran yasamal rayon Məhkəməsinin qərarında bunun bir sıra QHT-lərin, xarici QHT-nın filial və nümayəndəliklərinin fəalliyyətində aşkar edilmiş qanun pozuntuları ilə əlaqəli olduğu qeyd edilsə də, bu cinayət işi ilə radionun ofisində axtarış və götürmənin aparılması arasında hüquqi bağlılığın, istintaqın tam, obyektiv və hərtərəfli aparılmasına hansı töhfəni verəcəyi göstərilməyib.
İkinci qanun pozuntusu, axtarış və götürmədən dərhal sonra heç bir hüquqi əsas gətirilmədən radionun Bakı şəhəri Caspian Plaza biznes mərkəzinin 2-ci mərtəbəsində yerləşən ofisinin möhürlənməsidir. Burda digər bir qanunsuzluq möhürlənmənin hansı müddəti əhatə edəcəyi ilə bağlı istintaq orqanının hər hansı bilgi verməməsidir. Eyni zamanda ofisdə qalmış radionun və jurnalistlərin əmlkanının təhlükəsizliyi üçün məsuliyyətin kimin üzərində qalması da qaranlıq və qeyri-müəyyəndir.
Üçüncüsü, axtarış və götürmədən dərhal sonra radionun Bakı bürosunun əməkdaşları kütləvi şəkildə ifadə vermək üçün istintqa çağırılmış, onların yaşadıqları mənzillər polis nəzarətinə götürülmüş, evlərə və yaşadıqları mənzillərə qanunsuz və kütləvi reydlər həyata keçirilmiş, qanunsuz və əsassız olaraq məcburi gətirilməyə məruz qalmış, jurnalistlərin bəziləri yataq otağından oğurlanaraq ifadə vermək üçün istintaq idarəsinə aparılmış, jurnalistlərin ifadə vermək üçün vəkil müşayiəti məqsədilə professional hüquq xidmətindən istifadəsinə vaxt və zaman tanınmamış, müdafiəçinin iştirakı olmadan qeyri-iş günündə - 28 dekabr 2014-cü il tarixdə, bazar günündə zorakılıqla ifadələri alınıb.
Dördüncüsü, AR Baş prokurorunun müavini Rüstəm Usubovun 28 dekabr 2014-cü il tarixli qərarı ilə vəkil Yalçın İmanov radionun müdafiəsi işindən uzaqlaşdırılmış, şahid qismində dindirilmiş, bununla da, AzadlıqRadiosunun Bakı bürosu və onun büronun jurnalist əməkdaşları müdafiəsiz qalıb.
ATƏT Azərbaycan hakimiyyətindən AzadlıqRadiosunun işini davam etdirməsinə imkan verilməsini istəyir
ATƏT-in Media Azadlığı üzrə Nümayəndəsi Dunja Mijatović AzadlıqRadiosuna olan hücumları pisləyərək Azərbaycan hakimiyyətini ölkədə media azadlığına basqıları dayandırmağı çağırıb: “AzadlıqRadiosunun ofisində axtarış və ardınca da ofisin bağlanması Azərbaycanda azad media və ifadə azadlığına növbəti kəskin hücum dalğasıdır” – deyə dekabrın 29-da yayılan bəyanatda bildirilir.
Bəyanatda qeyd edilir ki, dekabrın 26-da prokurorluq əməkdaşları radionun ofisində axtarış aparıb, sənədləri, avadanlıqları götürüb, ofisin qapılarını isə möhürləyib. Bunun ardınca radionun əməkdaşları saxlanaraq ifadə vermək üçün istintaqa aparılıb. Onlar dindirildikdən sonra azad ediliblər:
“AzadlıqRadiosunda aparılan bu axtarış son aylar ölkədə azad mediaya qarşı olduqca narahatlıq doğuran basqılardan sonra baş verir. Bundan əvvəl Reportyorların Azadlığı və Təhlükəsizliyi İnstitutu, Media Azadlığı İnstitutu, Beynəlxalq Tədqiqatlar və Mübadilə Şurasının (İREX) ofisi bağlanıb, dekabrın əvvəlində isə AzadlıqRadiosunun əməkdaşı, araşdırmaçı jurnalist Xədicə İsmayıl istintaq dövrü üçün həbs edilib.
2014-cü ildə Azərbaycanda media azadlığı kəskin pisləşib. Ondan çox media təmsilçisi hazırda həbsdədir.
Azərbaycan hakimiyyəti AzadlıqRadiosunun fəaliyyətini davam etdirməsinə imkan verməli, ölkədə tənqidi səslərin də mövcudluğunu təmin etməlidir.”
Dekabrın 29-da Baş Prokurorluğun Ağır Cinayətlərə Dair İşlər İdarəsində AzadlıqRadiosunun 5 əməkdaşı və müxbiri dindirilib.
Dindirilənlərdən bəziləri idarəyə polis tərəfindən gətirilib, bəziləri isə telefonla dəvət olunub. Bu günə qədər ifadə verən 20-dən çox jurnalist və texniki əməkdaşın heç biri ifadə verməyə Azərbaycan qanunlarında qeyd olunan şəkildə bildirişlə dəvət olunmayıb və ifadə verənə qədər işi onlara aid olan detalları ilə bağlı tanış edilməyiblər.
AzadlıqRadiosunun vəkili dekabrın 28-də işə qəfil qərarla şahid qismində cəlb edilyindən dindirilmələrin bir çoxu vəkil iştirakı olmadan keçirilib, bir çox şahid qismində ifadələr hüquqi nümayəndəsiz alınıb.
AzadlıqRadiosunun bir sıra əməkdaşları dekabrın 28 və 29-a özləri ifadə vermək üçün könüllü İstintaq İdarəsinə gəlmələrinə baxmayaraq, onlar dindirilməyib.
İlkin olaraq AzadlıqRadiosu əməkdaşlarının məhz bu gün - dekabrın 29-da səhər prokurorluğa gəlmələri haqda vkillə razılıq var idi, ancaq dekabrın 28 səhər saatlarında onların bir çox evdən polis tərəfindən zorla idarəyə gətirilib.