ABŞ-ın kəşfiyyat və güvənlik rəsmiləri Rusiya və İranı seçkilər zamanı amerikalılar arasında nifaq salmaq üçün geniş kiberhücum və dezinformasiya kampaniyaları aparmaqda suçlayıblar. Milli Kəşfiyyat İdarəsinin, FTB-nin və ABŞ Kibergüvənlik və İnfrastrukturun Qorunması Agentliyinin birgə məlumatında belə deyilir.

Rusiyaya bağlı şəxslər seçkilərin legitimliyini zəiflətmək, seçki prosesi ilə bağlı seçicilərə qorxu aşılamaq, siyasi baxışlarına görə amerikalıların bir-birinə qarşı zor işlədə biləcəyi mövzularda saxta video və məqalələr hazırlayırlar.

"Zorakılığa həvəsləndirmə riski"

"Bu cəhdlər seçki komissiyası əməkdaşlarına qarşı zorakılığa həvəsləndirmə riski də daşıyır", - bəyanatda belə deyilir.

Yayılan saxta məqalələrin birində iddia edilir ki, hər iki namizədin mübarizə aparacağı mübahisəli ştatlarda ABŞ rəsmiləri seçki qutularına bülletenlər atacaq və dezinformasiya taktikasından yararlanacaqlar. Bir videomüsahibədə isə Arizonada seçkiləri saxtalaşdırmaqdan ötrü xaricdə saxta bülletenlərin hazırlandığı və seçki siyahılarının Harrisin xeyrinə dəyişdirildiyi iddia edilir.

Arizona ştatının rəhbəri videoda deyilənləri təkzib edərək onları saxta adlandırıb.

Dövlət agentliklərinin bəyanatında Rusiya "ən canlı təhlükə", İran "xarici təsirlərin önəmli təhdidi" adlandırılıb.

Bəyanatda Trampın seçki kampaniyasına kölgə salmaq üçün İranın zərərli kiberfəaliyyətlər gerçəkləşdirdiyinə də diqqət çəkilir.

Seçicilərə üz tutan rəsmilər bilgiləri güvənli və rəsmi qaynaqlardan əldə etməyə çağırıblar.

İran və Rusiya ABŞ-dakı seçkilər zamanı hər hansı dezinformasiya kampaniyasına qatıldıqlarını təkzib edib.

Buna da bax:

Tramp ABŞ-nin 47-ci prezidenti seçilir

Bu gündən Gürcüstan müxalifətinin aksiyaları gündəlik olacaq. Bunu "Dəyişikliklər uğrunda Koalisiya"nın liderlərindən biri Nika Meliya Gürcüstan parlamentinin binası qarşısında keçirilən mitinqdə deyib.

Onun sözlərinə görə, onlar "rejimi devirəcək bir güclü etiraz hərəkatı" yaratmaq niyyətindədirlər. Sabah, noyabrın 5-də aksiya iştirakçıları Tbilisi İdman Sarayında toplaşacaqlar.

"Hər gün küçədə olacağıq. Heç kim buraya [parlamentə] girə bilməyəcək qədər çox olmalıyıq, ancaq yalnız Rustavelidə dayanmaq kifayət deyil, biz bütün prospektlərdə dayanmalıyıq", - Meliya deyib.

Ehtimallara görə, müxalifət şəhərin əsas nəqliyyat arteriyalarını bağlamağı planlaşdırır. Bu gün müxalifətçilər xəbərdarlıq aksiyası keçiriblər. Onlar Tbilisinin mərkəzindəki Barataşvili körpüsündə nəqliyyatın hərəkətini dayandırıblar, daha sonra Marcanişvili meydanına doğru yürüş ediblər.

Etirazçılara Tbilisiyə gələn isveçli ekofəal Qreta Tunberq dəstək verib. O, Gürcüstan parlamentinin binası qarşısındakı aksiyaya qoşulub.

28 oktyabr

"Alternativimiz yoxdur"

Tbilisidə hakim "Gürcü arzusu" partiyasının parlament seçkilərindəki qələbəsini tanımayan müxalifət tərəfdarlarının mitinqi keçirilib. "Paper Kartuli" Telegram kanalının məlumatına görə, etirazçılar parlament binasının qarşısına toplaşaraq Rustaveli prospektini bağlayıblar.

Bundan əvvəl parlamentə keçən dörd müxalifət partiyasının hamısı "Gürcü arzusu"nun 54 faizə yaxın səs toplayaraq qalib gəldiyi seçkilərin nəticələrini tanımaqdan imtina edib. Bir çox müxalif siyasətçilərin fikrincə, nəticələr saxtalaşdırılıb. Gürcüstan prezidenti Salome Zurabişvili də səsvermənin nəticələrini tanımadığını bildirib.

Zurabişvili mitinqdə toplaşanlar qarşısında çıxış edib. O, Qərb liderləri ilə danışdığını və onların da seçkilərin qeyri-legitim olması ilə razılaşdıqlarını söyləyib. "Biz sizin konstitusion səsvermə hüququnuzu qorumaq üçün mübarizə aparacağıq. İndi bədbinlik vaxtı deyil, indi vacib olanı sakit və başımızı qaldıraraq səslərimizi qorumaqdır", - Gürcüstan prezidenti bildirib.

"And içə bilərəm ki, bu Avropa yolunun sonuna qədər və biz Avropanın qapılarına çatana qədər sizinlə olacağam. Bu, təkcə arzumuz deyil, reallıq və gələcəkdir, bizim alternativimiz yoxdur",- o, sözlərinə əlavə edib.

Müxalifət nümayəndələri təkrar seçkilərin keçirilməsini tələb ediblər. "Birlik-Milli Hərəkat" partiyasının liderlərindən biri Giorgi Vaşadze hesab edir ki, seçkilər beynəlxalq müşahidəçilərin nəzarəti altında keçirilməlidir.

Rusiyanın dövlət xəbər agentlikləri - TASS və "RİA Novosti" yazır ki, guya, "kütləvi etirazlar zamanı təxribatların təşkili üçün Ukraynada təlim keçmiş snayperlər" Tbilisiyə gəliblər. Lakin Gürcüstan və beynəlxalq medianın hadisə yerindən verdiyi məlumata görə, mitinqdə vəziyyət kifayət qədər sakit olub, qarşıdurma və həbslər qeydə alınmayıb.

Yerli vaxtla saat 21:30 radələrində mitinqin başa çatdığı elan edilib, sonda Gürcüstan və Avropa İttifaqının himnləri səsləndirilib.

"Mapchecking" xidmətinin hesablamalarına görə, aksiyada 15 minədək insan iştirak edib.

Ukrayna ordusu sənaye şəhəri - Kuraxovo yaxınlığında şiddətli döyüşlər getdiyini xəbər verir. Həmçinin, Rusiya qoşunlarının Donbasın strateji baxımdan mühüm Kuraxovka kəndi ətrafında 100-dən çox hücum gerçəkləşdirdiyini bildirsə də, onun tutulması ilə bağlı iddiaları şərh etməyib.

Noyabrın 3-də tərəflər qarşılıqlı dron hücumları gerçəkləşdirib.

Rusiya Müdafiə Nazirliyi düşmənin 20-dək PUA-sını zərərsizləşdirdiyini bildirib.

Gecəboyu sürən döyüşlərdən sonra gücü tükənən Ukrayna əsgərləri geri çəkilib və rusiyalılar irəliləyiblər.

Noyabrın 3-də rusiyalılar önəmli nəqliyyat məntəqəsi sayılan Pokrovskın 6 kilometrliyindəki bir kəndi tutduqlarını bildiriblər. Bu bilgini də təsdiqləməyən Ukrayna Baş Qərargahı Pokrovsk civarına 19 hücumun gerçəkləşdirildiyini, düşmənin başlıca səylərinin Promin və Vişnyovoye kəndləri səmtinə yönəldiyini deyib. Bununla belə, Ukrayna ordusu ən gərgin durumun Kuraxovo yaxınlığında olduğunu etiraf edib.

Bir gün öncə rusiyalılar şəhərə yaxın böyük su anbarının olduğu Kuraxovka kəndini ələ keçidiklərini bildiriblər.

Rusiyanın əsas məqsədi Pokrovsk şəhərini işğal etməkdir. Önəmli nəqliyyat və tədarük məntəqəsi olmaqla yanaşı, burada Ukraynanın sənayesi üçün böyük önəm daşıyan koks kömür mədəni yerləşir.

Ukrayna ordusunda əsgər, təchizat, eləcə də silah çatışmazlığı gözə çarpır. Bu durum ukraynalıların Rusiya hücumlarına dirənişini əngəlləyir.

"Amnesty International" etirazını oxuduğu universitetin həyətində soyunmaqla bildirən iranlı tələbəni dərhal azad etməyə çağırıb. Həmin tələbə "Bəsic" üzvləri ilə güvənlik qüvvələrinin basqısına məruz qaldığından elə davranmışdı. "Amnesty International"ın bəyanatında belə deyilir.

İran hakimiyyəti alt paltarınadək soyunan xanım tələbəni universitetin xaricində həbs etmişdi. Olayla bağlı videonu öncə "Əmir Kabir" tələbə kanalı, ardınca kürdlərin "Hengaw" insan haqları qrupu, "Amnesty International" və digər qurumlar yaymışdı.

"Azad edilənədək hakimiyyət onu işgəncə və digər pis davranışdan qorumalı, ailə üzvləri və vəkillə görüşə şərait yaratmalıdır", - bəyanatda əksini tapan sözlərdir.

Təşkilat həbs zamanı tələbənin döyülmə və cinsi zorakılığa məruz qalması ilə bağlı ittihamları müstəqil və qərəzsiz araşdırmağa, hadisəni törədənləri məsuliyyətə cəlb etməyə çağırıb.

Olayın səbəbləri ilə bağlı iki versiya var

"The Associated Press"in bilgisinə görə, tələbə yarımhərbi "Bəsic" qrupunun üzvləri ilə güvənlik qüvvələrinin basqısına məruz qalıb. Onlar xanım tələbənin baş örtüyünü və paltarını cırıblar. Buna etiraz olaraq alt paltarınadək soyunan tələbə universitet ərazisini nümayişkaranə şəkildə dolaşıb və ali məktəbin həyətindəcə oturub.

İranın "Fars" xəbər agentliyi isə iddia edir ki, tələbə uyğun geyimlə dərsə gəlmədiyi üçün universitet mühafizəçilərinin xəbərdarlığına etiraz olaraq soyunub.

Xanım tələbə ilə sakitcə danışıldığı və onunla aqressiv davranılmadığı deyilsə də, "Əmir Kabir" kanalının yaydığı bilgiyə görə, həbs zamanı onun başını maşının qapısına çırpdıqlarından təkərlərin üzərində qan izləri olub.

Şimali Koreya xarici işlər naziri Soy Son Hi bildirib ki, ölkəsi Ukraynadakı "qələbəsinədək" Rusiyanı dəstəkləyəcək.

Rusiyalı həmkarı Sergey Lavrovla noyabrın 1-də keçirdiyi görüşdə koreyalı nazir iki ordu və xüsusi xidmət orqanları arasında çox sıx əlaqələrin olduğunu, müdafiə sahəsində qarşılıqlı əməkdaşlığın genişləndirildiyini söyləyib.

Kreml öz ərazisində Şimali Koreya qoşunlarının yerləşdirilməsini nə danıb, nə də təsdiqləyib.

NATO baş katibi Mark Rutte deyib ki, şimali koreyalıların birbaşa döyüşlərə qatılması qlobal güvənliyə təhdiddir və beynəlxalq hüququn pozulduğunu, Rusiya prezidenti Vladimir Putinin "artan çarəsizliyini" göstərir.

ABŞ dövlət katibi Antoni Blinken döyüşlərə qatılacaqları halda, Kursk vilayətində yerləşən 8 minədək şimali koreyalı hərbçinin legitim hərbi hədəf sayılacağını söyləyib.

ABŞ, Cənubi Koreya və Yaponiya Şimali Koreyanın qitələrarası ballistik raket sınağını da pisləyib.

Soy isə Moskvada deyib ki, Koreya yarımadasındakı durum hər an "partlaya bilər" və bu üzdən Şimali Koreya özünün nüvə ehtiyatını gücləndirməli və gərəkəndə cavab zərbəsi endirməyə hazır olmalıdır.

Almaniya Cəmşid Şərməhdin edamına cavab olaraq İranın Frankfurt, Münhen və Hamburqdakı konsulluqlarını qapadacaq. Almaniya xarici işlər naziri Annalena Berbok oktyabrın 31-də belə deyib. Edam edilən şəxs həm İran, həm də Almaniya vətəndaşı olub.

"Dəfələrlə və aydın şəkildə söyləmişik ki, Almaniya vətəndaşının edam edilməsi ciddi fəsadlara yol açacaq", - Berbokun sözləridir. O, ölkəsinin İrandakı səfirini məsləhətləşmələrə, Almaniyanın etirazını çatdırmaq üçünsə İranın müvəqqəti işlər vəkilini nazirliyə çağırıb.

Sözügedən konsulluqların Almaniya vətəndaşlığı olmayan 32 əməkdaşı ölkəni tərk etməlidir. Qərar Berlindəki səfirliyə aid deyil.

Berbokun iranlı həmkarı Abbas Əraqçi Almaniya vətəndaşlığının heç kəsi toxunulmaz etmədiyini deyərək qərarla bağlı etirazını bildirmək üçün Almaniyanın İrandakı müvəqqəti işlər vəkilini nazirliyə çağırıb.

İranın hökümətyönlü mediasında Şərməhdin terror hücumları ilə bağlılığına görə edam edildiyi bildirilib.

Almaniya kansleri Olaf Şolts bu edam olayını İran hökuməti üçün "qalmaqal" adlandırıb.

Aİ-nin xarici işlər və təhlükəsizlik siyasəti üzrə ali nümayəndəsi Jozep Borrel qurumun cavab tədbirləri üzərində düşündüyünü bildirib.

Edamı ədalətsiz sayan ABŞ "İran rejimini məsuliyyətə cəlb etmək" istəyində digər ölkələrlə həmrəy olduğunu diqqətə çatdırıb.

Xatırlatma

69 yaşlı Şərməhd İranda şahpərəst qrupa rəhbərlikdə suçlanıb. Rəsmi Tehranın iddiasına görə, o, 2008-ci ildə Şirazda baş verən partlayışı və digər terror olaylarını planlaşdırıb. Şirazda dini mərasim zamanı partlayışda 14 nəfər ölmüş, 200-dən çox adam yaralanmışdı.

Şərməhdin ailəsi ittihamları rədd edir və onları "absurd" adlandırıb.

Gürcüstan prezidenti Salome Zurabişvili son parlament seçkilərinin saxtalaşdırılması iddiaları ilə bağlı Baş Prokurorluqda dindirilməkdən imtina edib. Bundan əvvəl o, 26 oktyabr seçkilərini qeyri-legitim hesab etdiyini, hakim "Gürcü arzusu" partiyasının qələbəsinin saxtalaşdırıldığını bildirib.

Çərşənbə günü brifinqdə Zurabişvili prokurorluqda oktyabrın 31-nə təyin olunmuş söhbətə getməyəcəyini deyib. O vurğulayıb ki, prokurorluq qanun pozuntularına dair sübutları özü axtarmalı, dövlət başçısından bunu tələb etməməlidir. Prezident brifinqə seçki saxtakarlığı texnologiyaları haqqında videoçarx nümayiş etdirməklə başlayıb.

"Prokurorluğa məsləhət görərdim ki, işə başlasınlar və prezidentlə siyasi hesablaşmalardan çəkinsinlər. Prokurorluğa müraciət edirəm: siz xalqa hesabatlısınız, ictimaiyyət sizdən mənim sübutlarımı yox, təcili araşdırma tələb edir", - Zurabişvili əlavə edib.

Salome Zurabişvili sorğu-suala tutulacaq

Gürcüstan prezidenti Salome Zurabişvili prokurorluğa çağrılıb. Prokurorluğun bəyanatında deyilir ki: "İstintaq zamanı iddia edilən cinayət faktları ilə bağlı bilgiləri ola biləcək bütün şəxslər sorğu-sual ediləcək".

İstintaq ABŞ prezidenti Co Baydenin (Joe Biden) Gürcüstanda demokratiyanın geriləməsindən dərin təlaş keçirdiyini bildirməsindən sonra başladılıb. Bayden seçki saxtakarlıqları ilə bağlı ittihamlara şəffaf istintaqla cavab verilməsini istəyərək bunu da sözlərinə əlavə edib: "Gürcüstan hökumətini gerçək seçkilərin bərpası üçün dərhal bütün siyasi qüvvələrin cəlb edildiyi dialoq başlatmağa səsləyirik".

Artan beynəlxalq basqının ardından Gürcüstanın Mərkəzi Seçki Komissiyası oktyabrın 29-da bütün 84 seçki dairəsinin təsadüfi seçilmiş hər 5 məntəqəsində bülletenlərin yenidən sayılacağını bildirib.

Zurabişvili: 'Avropa yolunda qalmağımızdan ötrü Qərbin basqısı lazımdır'

Gürcüstan prezidenti Salome Zurabişvili Qərbi hakim "Gürcü arzusu" partiyasına "oğurladığı" səsləri yenidən saymaq üçün təzyiq göstərməyə səsləyib. Bu barədə AzadlıqRadiosuna danışan xanım prezident bu baş verməsə, ölkənin Avropa perspektivini itirəcəyini deyib.

Zurabişvili və müxalifət 300 minədək səsin hakim partiyanın xeyrinə yönəldiyini, nəticədə "Gürcü arzusu"nun 54 faiz səs topladığını söyləyir.

"Qərb təzyiq göstərməsə, Gürcüstanı öz tərəfində saxlamaq və Avropa perspektivimizi qorumaq üçün bütün imkanlarını sınamamış olacaq", - Zurabişvilinin sözləridir.

Zurabişvili bildirib ki, exit-poll sorğuları Mərkəzi Seçki Komissiyasının (MSK) rəsmi nəticələri ilə haçalanır. Müxalifətin iki exit-poll-u hakim partiyanın 42 faiz, rəsmi bilgilərsə 54 faiz səs topladığını açıqlayıb. Üstəlik, həmin sorğular dörd müxalif partiyanın səslərinin aydın çoxluğunu qazandığını söyləsə də, MSK bütün müxalifət qüvvələrinin toplam 37 faiz səs topladığını bildirib.

ATƏT, Avropa Şurası, Avropa Parlamenti və NATO-nun birgə bəyanatında deyilir ki, "qeyri-bərabər rəqabət ortamı, basqı və gərginlik seçkilərə kölgə salıb". Seçki günü səslərin satın alınması, ikili səsvermə, fiziki zorakılıq və hədə-qorxu hallarına rast gəlindiyinə də diqqət çəkilib

"Rusiya özəl əməliyyatının qurbanı"

ABŞ, Aİ, Kanada və İsveç ölkədəki seçkilərdən sonrakı durumu tənqid ediblər.

Seçkilərin "Rusiya özəl əməliyyatı"nın qurbanına çevrildiyini söyləyən Zurabişvili nəticələri tanımaqdan boyun qaçırıb.

Rusiya seçkilərə təsir göstərməsinə dair ittihamları rədd edib.

"Gürcü arzusu" partiyası 2012-ci ildən hakimiyyətdədir. Qərbyönümlü siyasət apardığını söyləsə də, son iki ildə hakimiyyət ölkənin siyasi kursunu Rusiya istiqamətində dəyişib.

Oktyabrın 28-də Naim Qasım Livandakı "Hizbullah" silahlı qruplaşmasının baş katibi seçilib. AzadlıqRadiosunun əməkdaşı Kian Şərifi bunu bildirərkən əsas vəzifəyə iddialıların sayca çox olmadığına da diqqət çəkib.

Qasım 1991-ci ildən baş katibinin müavini olub. O, sentyabrın 27-də "Hizbullah"ın İsrail zərbələri nəticəsində öldürülən uzunmüddətli lideri Həsən Nəsrullahın yerinə keçib. Nəsrullahı əvəzləyəcək Haşim Səfiəddini də İsrail ordusu öldürüb.

Ekspertlərin fikrincə, hərbçi əvəzinə təcrübəli siyasətçi təyin etməklə "Hizbullah" İsraillə savaşa danışıqlar yolu ilə son qoymaq niyyətindədir.

"Rəqibləri ilə danışıqlar aparmaqdan ötrü "Hizbullah"ın başında təcrübəli siyasətçi olmalıdır", - Londondakı Şərq və Afrika Araşdırmaları Məktəbinin Yaxın Şərq İnstitutunun direktoru Lina Xatib X sosial şəbəkəsi hesabında belə bildirib.

Qasım müvəqqəti başçıdır?

Di gəl, İsrail müdafiə naziri Yoav Qallant qruplaşma ilə danışıqlar aparmaq fikirlərinin olmadığını deyərək Qasımın təyinatını "müvəqqəti" adlandırıb.

"Hizbullah"ı terrorçu qurum sayan ABŞ 2018-ci ildə Qasımı da terrorçular siyahısına salıb, üstəlik, Qasıma qarşı sanksiyalar da tətbiq edib.

Qasım 1992-cı ildən Livanda parlament seçkilərinə qatılan "Hizbullah"ın siyasi kampaniyalarının təşkilində yaxından iştirak edib. Onun səyləri nəticəsində "Hizbullah" silahlı qruplaşmadan Livanın ən nüfuzlu siyasi partiyasına çevrilə bilib.

Qasımın 71 yaşı var. O, "Hizbullah"a 1980-ci illərdə - qruplaşma yeni yaradılarkən qoşulub. Nəsrullah kimi Qasımın da İranla sıx bağlantıları var. Öncəki başçıdan fərqli olaraq İrana səfərlərini gizlətməyən Qasım bu ilin iyulunda prezident Məsud Pezeşkianın andiçmə mərasiminə qatılıb.

ABŞ, Kanada və İsveç Gürcüstanda parlament seçkilərindən sonrakı durumu tənqid edib. Rusiyayönümlü "Gürcü arzusu" partiyası qələbəsini açıqlasa da, bu, müxalifətin kütləvi nümayişləri və pozuntular barədə dolaşan bilgilər fonunda baş verir. Müxalifət düşərgəsi isə seçkilərin saxtalaşdırılmasından, rəsmi Moskvanın seçki sonuclarını yönləndirməsindən danışır.

İsveç Gürcüstan hökuməti ilə birbaşa əməkdaşlığı dayandırdığını, Kanada isə ikitərəfli əlaqələri yenidən nəzərdən keçirəcəyini bildirib.

Rəsmi Stokholmun Gürcüstandakı "həyəcanlı" siyasi olaylardan "uzunmüddətli təlaşı" vardı. İsveçin inkişaf və xarici ticarət naziri Benyamin Dousanın fikrincə, pozuntular barədə bilgilər həmin təlaşın əsassız olmadığını təsdiqləyib. Gürcüstan hökuməti ilə birbaşa əlaqələri dayandırsa da, İsveç bu ölkənin vətəndaş cəmiyyəti təmsilçilərinə 2 milyon 300 min dollar ayıracaq.

Kanada Xarici İşlər Nazirliyi də öz bəyanatında "seçicilərin geniş miqyasda qorxudulmasına, səslərin satın alınmasına və başqa pozuntulara görə" narahatlığını dilə gətirib və bildirib: "Kanada Gürcüstan hakimiyyəti …demokratiya baxımından ölkədəki geriləməni aradan qaldırandan dərhal sonra ikitərəfli əməkdaşlığa açıqdır".

ABŞ Senatının xarici əlaqələr komitəsinin sədri, Merilend ştatından demokratlar partiyasını təmsil edən senator Ben Kardin (Ben Cardin) seçkilərdəki pozuntuları "məyusedici" sayaraq deyib: "Mən seçkisonrası ortamı yaxından izləyəcək və ABŞ-Gürcüstan münasibətlərinə dair "yerində sayılacaq cavabı" müəyyənləşdirmək üçün Bayden-Harris administrasiyası ilə işləyəcəyəm".

Qərb ölkələri Gürcüstan prezidenti Salome Zurabişvilinin oktyabrın 28-də on minlərlə vətəndaşı etiraza səsləyəndən sonra bu açıqlamaları verib. Hakim "Gürcü arzusu" ilə arası dəymiş S.Zurabişvili seçki sonuclarını tanımaqdan boyun qaçıraraq hakim partiyanı Rusiyanın hibrid savaş üsullarından yararlanmaqda suçlayıb.

Rəsmi nəticələrə görə, "Gürcü arzusu" səslərin 54 faizini toplamaqla hökumətə nəzarəti əlində saxlayıb.

Buna da bax:

Gürcüstan müxalifəti gündəlik etiraz aksiyalarına başladığını elan edib

Oktyabrın 29-da Rusiyanın Xarkova endirdiyi zərbə nəticəsində dörd nəfər ölüb. Şəhərin meri İhor Terexov öz Telegram kanalında belə yazıb.

Ukraynanın ikinci ən böyük şəhəri olan Xarkovun Osnovyansk səmtində mülki infrastruktura və yaşayış evlərinə ziyan dəyib. Bu, son yarımildə Xarkova edilən ikinci hücumdur. Birinci hücum zamanı şəhər mərkəzinə endirilən zərbələrdə doqquz nəfər yaralanmışdı.

Oktyabrın 29-da Kiyev də Rusiya PUA-ları ilə vurulub. Paytaxtın meri Vitali Kliçkonun Telegram hesabında yazdığına görə, birinin durumu ağır olmaqla altı nəfər yaralanıb.

2022-ci ilin fevralında Rusiya Ukrayna ərazisinə təcavüz edib.

NATO Rusiyanın Ukrayna ilə həmsərhəd Kursk bölgəsinə Şimali Koreya hərbçilərinin yerləşdirilməsini təsdiqləyib. Qurumun baş katibi Mark Rutte onların Rusiyaya gəlişini Ukraynadakı savaşda "önəmli eskalasiya" adlandırıb. O, oktyabrın 28-də Brüsseldə verdiyi açıqlamada həmin sözləri dilə gətirib.

Baş katibin fikrincə, Rusiyanın müharibədə 600 mindən çox ölü və yaralı hərbçisi olduğundan prezident Vladimir Putin "çarəsiz" durumdadır. Rutte düşünür ki, Rusiyaya öncə silah-sursat tədarükü, indi də hərbçilərin göndərilməsi Şimali Koreya ilə əlaqələrinin genişlənməsinə işarədir.

Şimali Koreyanın 3 mindən çox əsgər göndərdiyi bildirilir. Daha 12 min hərbçinin də dekabrda Rusiyaya yerləşdirilməsi gözlənilir. Bunların arasında döyüş təyyarəsi pilotlarının da yer aldığı deyilir.

Ekspertlərin olaya münasibəti birmənalı deyil

Bəziləri Şimali Koreya dəstəyinin Rusiya qoşunlarını gücləndirəcəyini, digərləri isə onların Rusiya ərazisini qorumaq və tutulan bölgələrdə müdafiə xətləri inşa etmək üçün gətirildiyini deyirlər.

Cənubi Koreya siyasətçiləri bildirirlər ki, şimallıların əsgərləri döyüş bölgələrində yer almasalar da, hərbi avadanlıqdan, o sıradan PUA-lardan istifadə ilə bağlı təlimlərə qatılırlar.

Həftəsonu Vaşınqtonda ABŞ müdafiə naziri Lloyd Ostin (Lloyd Austin) və dövlət katibi Antoni Blinken (Antony Blinken) Cənubi Koreya həmkarları ilə görüşəcək. Pentaqon sözçüsü Sabrina Sinqh (Sabrina Singh) deyib ki, ABŞ-nin verdiyi silahlardan şimali koreyalılara qarşı çəkinmədən istifadə etmək olar.

Beynəlxalq sanksiyalar altında olan Rusiya və Şimali Koreya, özəlliklə Ukrayna müharibəsi başlayandan bəri hərbi və ticari əlaqələrini genişləndirir. İddialara görə, Şimali Koreya Rusiyaya silah-sursat, o cümlədən raketlər tədarük edəcək. Əvəzində isə Rusiya rəsmi Pxenyanın mübahisəli kosmik proqramının inkişaf etdirilməsinə yardım göstərəcək. ABŞ iki ölkə arasında dərinləşən əlaqələrdən narahatlığını dəfələrlə dilə gətirib.

Ötən həftə Şimali Koreya hərbçilərinin döyüş zonasına yerləşdirildiyinə diqqət çəkən Ukrayna prezidenti Volodimir Zelenski hər iki ölkəyə qarşı "hiss olunacaq" beynəlxalq basqını vacib sayıb.

Oktyabrın 27-də Özbəkistan prezidenti Şavkat Mirziyoyevə loyal hakim partiya parlament seçkilərində asanlıqla qalib gəlib, - AzadlıqRadiosunun Özbəkistan bürosu Mərkəzi Seçki Komissiyasının (MSK) açıqladığı ilkin sonuclara dayanaraq belə bildirib.

MSK Mirziyoyevin Liberal Demokratik Partiyasının parlamentin aşağı palatasındakı 150 yerdən 64 yeri tutacağını açıqlayıb. Ölkədə keçirilən islahatlar və Mirziyoyevin seçkilərdə "güclü rəqabət" olacağı proqnozuna baxmayaraq, nəticələr bu cür olub.

Seçkilərə qatılmaq istəyən müxalifət partiyaları qeydiyyata alınmayıb. Əvəzində, ekspertlərin fikrincə, prezidentə yaxın dörd "cib" siyasi qüvvə hakim partiyaya "müxalif" olub və, beləcə, parlamentdə təmsil olunmaq üçün bütün beş partiya tələb edilən həddi keçə bilib.

MSK-nın açıqladığına görə, seçici fəallığı 75 faiz olub və seçkilər baş tutmuş sayılıb.

Seçkini izləyənlər, insan haqları qrupları və siravi vətəndaşlar həmin rəqəmə inanmırlar.

AzadlıqRadiosunun özbək xidməti ölkə vətəndaşlarına istinad edərək seçki fəallığının çox aşağı olduğunu bildirib. "ABŞ-dəki seçkilər bizdən ötrü ölkəmizdəkindən daha önəmlidir", - sosial şəbəkə istifadəçilərdən birinin sözləridir.

ATƏT müşahidəçi qrupunun ilkin rəyində deyilir ki, səsvermə, səslərin sayılması və nəticələrin müəyyənləşdirilməsi zamanı müşahidəçilər problemlərlə üzləşiblər. Bildirilir ki, şəffaflığın və rəsmilərin seçki fəallığı və nəticələrə aid bilgilərə güvəni artırmaq üçün daha çox iş görülməlidir.

İslahatların bəlli irəliləyişlərə yol açdığını bildirən ATƏT-in qısamüddətli müşahidəçilər missiyası eyni zamanda etiraf edib ki "toplaşma, ifadə və digər azadlıqların gerçəkləşdirilməsi sahəsində önəmli çağırışlar qalmaqdadir".

Ölkə konstitusiyası və seçki məcəlləsinə dəyişikliklərdən sonra ilk dəfə səsvermə qarışıq seçki sistemi modeli üzrə keçirilib - 75 deputat majoritar, digər 75 nəfərsə partiya siyahıları üzrə parlamentə seçilib.

Hərbi obyektləri atəşə tutulan İran İsraili cavab zərbələri ilə hədələyib. Bu hədələri İslam İnqilabı Keşikçiləri Korpusunun (İİKK) qərargah rəisi Hüseyn Salami dilə gətirib. O, oktyabrın 28-də deyib ki, İsrail iki gün əvvəlki hava zərbələrinə görə acı fəsadlarla qarşılaşacaq.

İran Xarici İşlər Nazirliyinin sözçüsü də rəsmi Tehranın İsrailə cavab vermək üçün əlindəki bütün vasitələrdən yararlanacağını söyləyib.

İsrail oktyabrın 26-da İranın hərbi obyektlərinə dəqiq və uğurlu zərbələr endirdiyini açıqlayıb və bunun oktyabrın 1-də İsrail ərazisinə buraxılan raketlərə cavab olduğunu deyib. İran da bəyan edib ki, onun raket hücumu İsrailin daha öncə İİKK-nın bir neçə yüksəkrütbəli zabitinin öldürülməsinə cavab idi.

Ekspertlər düşünürlər ki, bu yolla hər iki ölkə böyük savaşdan boyun qaçıra bilib.

Zərbələrdən öncə İsraildən xəbərdarlıq aldığını və atılan raketlərin çoxunun zərərsizləşdirildiyini bildirən İran dörd hərbçisinin həlak olduğunu da etiraf edib.

Ölkənin ali dini lideri Əli Xamenei zərbənin "yanlış hesablanmış" olduğunu desə də, ölkəsini cavab atəşinə səsləməyib.

H.Salami də Qəzza və Livanda İranın dəstəklədiyi qruplaşmalara qarşı müharibə aparan İsrailin son hava zərbələrini "yanlış hesablama və acizlik" göstəricisi adlandırıb.

Peyk görüntülərinə əsasən, İranın hədəfə alınmış hərbi bazalarına ziyan dəydiyi iddia edilir. İran sözügedən ziyan barədə iddiaları təsdiqləməyib.

İqlim layihələrinə ayrılan 24-41 milyard dollar arası vəsaitin hesabatı düzgün aparılmayıb. AzadlıqRadiosu bu xəbəri yayarkən "Oxfam"ın Dünya Bankı və Beynəlxalq Valyuta Fondunun Vaşinqtonda keçiriləcək illik toplantısı ərəfəsində açıqladığı sonuncu hesabata dayanıb.

"Oxfam" 2017-2023-ci illərdə ayrılan maliyyə barədə hesabatların düzgün aparılmadığını bildirib. Vəsaitin nəyə və necə xərclənməsi aydın bilinmədiyindən ayrılan maliyyənin nəyə təsir göstərdiyini hesablamaq mümkünsüzdür. Üstəlik, pulların az və ortagəlirli ölkələrə ayrılması da qeyri-müəyyən qalır.

Bütün bankların iqlimə ayırdığı toplam vəsaitin 52 faizi Dünya Bankının payına düşür.

"Bu… gözdənqaçırma deyil"

Azərbaycanda bu il keçiriləcək COP-29 sammitində iqlim dəyişikliyinə ayrılan maliyyə başlıca müzakirə mövzularından biri olacaq.

"Bu, adicə bürokratik gözdənqaçırma deyil. COP-da bu il əldə etməli olduğumuz nailiyyətləri pozmaq üçün güvənin təməldən sarsıdılmasıdır", - "Oxfam International"ın Vaşınqton nümayəndəliyin başçısı Keyt Donald (Kate Donald) belə deyib.

Sözügedən maliyyənin necə istifadə edildiyi barədə bilgi almağın çətinliyindən gileylənən nümayəndəlik rəhbəri bu prosesin şəffaf və hər kəsə, özəlliklə bu vəsaitdən yararlanacaq icmalara açıq olmasının önəmini vurğulayıb.

Həbsxanada olan İran azərbaycanlısı, Nobel Mükafatı laureatı və insan haqları qoruyucusu Nərgiz Mohəmmədi Tehran xəstəxanalarından birinə yerləşdirilib. Onun əri oktyabrın 27-də AzadlıqRadiosuna belə deyib və xanımının sağlığı ilə bağlı iki aydan çox problem yaşayandan sonra müalicəsinə başlandığını bildirib. N.Mohəmmədiyə doqquz həftəyə yaxın tibbi yardım göstərilməsinə icazə verilməyib.

"Nərgiz Mohəmmədinin, axır ki, xəstəxanaya yerləşdirilməsi vətəndaş cəmiyyəti və insan haqları müdafiəçiləri ilə "Nərgizə Azadlıq Koalisiyası"nın dəstəyinin, beynəlxalq ictimaiyyət və medianın basqısının sonucudur", - Nobel mükafatçısının əri Tağı Rəhmaninin X sosial şəbəkəsində açıqladığı sözlərdir.

Parisdə yaşayan Rəhmani bunu da deyib ki, tibbi yardımın gecikdirilməsi, xanımının həbsxanada keçirdiyi illər və tək saxlanılma ortamı səhhətində ciddi problemlər yaradıb. 52 yaşlı N.Mohəmmədi son 20 ildə dəfələrlə həbs edilib və sonra azadlığa buraxılıb. İndi o, "İran əleyhinə təbliğat" yaymaqda suçlanaraq bir illik həbs cəzasını çəkməkdədir.

Rusiya ordusu Ukraynanın şərqində irəlilədiyini iddia edir. Ukrayna hakimiyyəti isə oktyabrın 27-də Xersonun mərkəzinin amansız hücumlara məruz qaldığını, azı iki dinc sakinin öldürüldüyünü açıqlayıb.

Rusiya prezidenti Vladimir Putin bir daha Kiyevi hədələyib. O deyib ki, Qərb müttəfiqləri Ukraynaya onun ərazilərinin dərinliklərini uzaqmənzilli silahlarla vurmağa icazə versə, Kreml buna cavab verəcək.

"Bunu hələ deməyə tezdir, ancaq hərbi idarəmiz bu barədə düşünür və müxtəlif reaksiyalar təklif edəcək", – Putin oktyabrın 27-də dövlət televiziyasına deyib.

Ukrayna prezidenti Volodimir Zelenski Qərb tərəfdaşlarına bu icazəni almaq üçün təzyiq göstərir. Qərb isə sərhəd regionundan kənarda belə silahların istifadəsinin münaqişəni genişləndirəcəyindən ehtiyatlanır.

Rusiyanın Müdafiə Nazirliyi ordunun İzmaylovka kəndini tutduğunu açıqlayıb. Ukraynanın bu kəndi Donetsk vilayətindəki Kuraxovo sənaye mərkəzindən şimalda yerləşir.

Xersonun mərkəzinə isə Rusiya dron və raket zərbələrini intensivləşdirib. Bu şəhərin 280 minə yaxın əhalisi olduğu bildirilir. Zərbələr nəticəsində iki nəfər həlak olub, yaralılar var.

Ukrayna ordusu cəbhədə vəziyyətin çətin olduğunu, düşmənin canlı qüvvə və avadanlıq məsələsində üstünlüyünü saxladığını bildirib.

Oktyabrın 24-də Avropa Parlamenti venesuelalı müxalifətçilər Mariya Korina və Edmundo Qonsalesi Andrey Saxarov adına "Düşüncə azadlığı" mükafatı ilə təltif edib.

Laureatlar mükafata "azadlıq və demokratiyanın bərpası uğrunda mübarizə aparan Venesuela xalqını təmsil etdikləri" üçün layiq görülüblər.

2024-cü ilin iyulunda Venesuelada prezident seçkiləri keçirilib. Müxalifətin açıqladığı nəticələrə görə, onların namizədi Qonsales inandırıcı qələbə qazanıb. Lakin milli seçki şurası indiki prezident Nikolas Maduronu qalib elan edib.

Avqusta müxalifət bütün səsvermə protokollarını təqdim edəndən dərhal sonra 75 yaşlı Qonsales və 56 yaşlı Korina ilə bağlı istintaqa başlanılıb. Onlar yalan məlumatlar yaymaq, itaətsizlik çağırışları, üsyana təhrik və cinayətkar sövdələşmədə ittiham olunurlar. O vaxtdan bəri Marina Korina Maçado Venesuelada gizlənir. Edmundo Qonsales ölkəni tərk edə bilib və İspaniyada məskunlaşıb.

17 oktyabr

Qubad İbadoğlu 2024-cü il Saxarov mükafatının finalçısı seçilib

Oktyabrın 17-də Avropa Parlamentinin Xarici Əlaqələr və İnkişaf komitələrinin üzvləri gizli səsvermə yolu ilə 2024-cü il Saxarov mükafatının üç finalçısını seçiblər. Onlardan biri azərbaycanlı akademik və antikorrupsiya fəalı professor Qubad İbadoğludur.

Yekun siyahıda Venesueladakı demokratik qüvvələrin lideri Mariya Korina Maçado və son seçkilərdə ölkənin prezidenti seçildiyi bildirilən Edmundo Qonsales Urrutiyanın (vahid nominasiya) da adları var. Digər nominantlar isə "Qadınlar Sülh Uğrunda" və "Günəşin Qadınları" (İsrail/Fələstin) təşkilatlarıdır (vahid nominasiya).

Bir həftə sonra, oktyabrın 24-də Prezidentlər Konfransı (Avropa Parlamentinin prezidenti Roberta Metsola və siyasi qrupların liderləri) Fikir azadlığı üzrə Saxarov mükafatının 2024-cü il üzrə laureatını seçəcək. Qalib(lər)in adları Strasburqda keçiriləcək plenar iclasda elan olunacaq.

50 min avro fondu olan mükafatın təqdimat mərasimi bu ilin dekabrında Strasburqda plenar iclasda baş tutacaq. Final mərhələsinə adlayan hər üç namizəd mükafatlandırma mərasiminə dəvət olunacaq.

Professor Qubad İbadoğlunun Saxarov mükafatına namizədliyi Avropa Parlamentinin Yaşıllar-Azad Avropa Birliyi fraksiyası tərəfindən irəli sürülüb. "İbadoğlu insan haqları müdafiəçisi, rejimin və mədən sənayesinin tənqidçisidir. Bu, Bakıdakı COP29-dan bir neçə həftə əvvəl Azərbaycana göndərilmiş güclü mesajdır!", – X şəbəkəsində paylaşılan mesajda deyilib.

Tanınmış sovet fizika alimi, siyasi dissident Andrey Saxarovun şərəfinə verilən Fikir azadlığına görə Saxarov mükafatı Avropa İttifaqının insan haqları üzrə ən yüksək mükafatıdır. O, 1988-ci ildən bəri hər il parlament tərəfindən fərdlərə və ya təşkilatlara insan hüquqlarının və əsas hüquqların müdafiəsi, xüsusilə ifadə azadlığı, azlıqların hüquqlarının qorunması, beynəlxalq hüquq, demokratiyanın inkişafı və qanunun aliliyinin müdafiəsi sahəsində gördükləri işlərə görə verilir.

Nelson Mandela və Anatoli Marçenko, həmçinin dissidentlər, siyasi liderlər, jurnalistlər, hüquqşünaslar, vətəndaş cəmiyyəti fəalları, Birləşmiş Millətlər Təşkilatı və təhsil hüququna görə mübarizə aparan uşaq hüquqları fəalı bu mükafata layiq görülüblər.

Bu mükafatı almış Nelson Mandela, Malala Yusufzay, Deni Mukveqe və Nadya Murad Nobel Sülh Mükafatını da layiq görülüblər.

Xatırlatma

Q.İbadoğlu ötən il iyulun 23-də həbs edilmişdi. O, Cinayət Məcəlləsinin (CM) 204.1-ci (Satış məqsədi ilə saxta pul... və ya xarici valyuta hazırlama, əldə etmə və ya satma - mütəşəkkil dəstə tərəfindən törədildikdə) maddəsi ilə ittiham olunub. Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb. Q.İbadoğlu ittihamları saxta adlandırıb.

Bu il aprelin 22-də onun barəsində seçilmiş həbs-qətimkan tədbiri ev dustaqlığı, daha sonra isə müstəntiqin qərarı ilə polisin nəzarətinə verilmə ilə əvəz olunub.

Q.İbadoğlu dövlət qeydiyyatına alınmayan Azərbaycan Demokratiya və Rifah Partiyasına (ADR) rəhbərlik edib. Amma ev dustaqlığına buraxılandan sonra səhhəti ilə bağlı siyasi fəaliyyətinə fasilə verdiyini açıqlayıb.

BMT baş katibi Antonio Quterreş oktyabrın 24-də Kazanda keçirilən BRICS sammitində Rusiya prezidenti Vladimir Putinlə görüşüb. O, Putinə Rusiyanın Ukraynaya hərbi müdaxiləsinin BMT xartiyasına və beynəlxalq hüquqa zidd olduğunu deyib. BMT-nin açıqlamasında belə bildirilir.

Sammitə qatılanlar və Putin qarşısında çıxış edən Quterreş Ukraynada "ədalətli" sülhə çağırıb: "Bizə Ukraynada sülh lazımdır. BMT xartiyasına, beynəlxalq hüquqa və Baş Assambleya qətnamələrinə uyğun bir sülh".

Səfər Ukraynada qəzəbli reaksiya doğurub. Xarici İşlər Nazirliyi İşveçrədə keçirilən Dünya Sülh Sammitinə Ukraynanın dəvətini qəbul etməyən Quterreşin əvəzində Kazana "savaş canisinin dəvəti ilə" yollanmasını yanlış seçim adlandırıb. "Bu, sülhün bərqərar olmasına xidmət etmir və olsa-olsa, BMT-nin nüfuzunu sarsıdır", - nazirliyin X sosial şəbəkəsindəki paylaşımında belə deyilir.

BRIKS sammitinə İran və Türkiyə prezidentləri ilə yanaşı, 36 ölkənin lideri qatılıb

Beləcə, Rusiya dünyanın öndə gələn ölkələrinə öz gücünü və özəlliklə Qərb dövlətlərinə Putinlə görüşmək istəyənlərin sayca tükənmədiyini göstərmək istəyib.

Oktyabrın 24-də Ukraynanın şərqindəki Kupyansk şəhərinə Rusiyanın hava zərbələri nəticəsində bir nəfər ölüb, 10 nəfər yaralanıb.

"Ağır durumdakı bir qadın xəstəxanaya çatdırılsa da, həyatını qurtarmaq mümkün olmayıb", - Xarkov vilayətinin başçısı Oleh Sınyehubovun sözləridir.

Donetsk vilayətinin strateji önəmli Pokrovsk şəhəri yaxınlığına da havadan zərbə endirilib. Nəticədə yaşları 58-65 arasında olan iki kişi və bir qadın öldürülüb.

Ukrayna Havadan Müdafiə Sistemləri ölkənin 11 vilayətini hədəf alan 50 PUA-dan 40-nı vurub. Daha 7 PUA naviqasiya sistemlərinə elektron müdaxilə ilə zərərsizləşdirilib.

Ukrayna hərbçiləri Şimali Koreya əsgərlərinin Rusiyanın Kursk vilayətindəki yerini müəyyənləşdirib. Kəşfiyyat bilgilərinə görə, koreyalılar hələ oktyabrın 23-dən döyüş zonasına gəlməyə başlayıb. Daha öncə şimali koreyalıların Rusiyaya gəlməsi "saxta xəbər" kimi qələmə verilsə də, Vladimir Putin koreyalıların artıq Rusiyada olmasını inkar etməyib.

Rusiya Duması Şimali Koreya ilə strateji tərəfdaşlıq sazişini təsdiqləyib

Oktyabrın 24-də təsdiqlənən sazişdə deyilir ki, "tərəflərin biri müharibə şəraitində olarsa, digəri ixtiyarında olan bütün vasitələrdən yararlanmaqla dərhal hərbi və digər gərəkli yardım göstərməlidir".

ABŞ müdafiə naziri Lloyd Ostin (Lloyd Austin) belə yardımların Şimali Koreya üçün fəsadlara gətirib çıxara biləcəyini bildirib.

Milli Güvənlik Şuranın sözçüsü Con Kirbi (John Kirby) oktyabrın ortalarında Rusiyaya 3 minədək şimali koreyalı əsgərin gətirildiyini güman edir.

"Onların niyyəti Rusiya tərəfində savaşa qatılmaqdırsa, bu, çox ciddidir və təkcə Avropa yox, Hind və Sakit okeanları regionundakı məsələlərə təsirsiz ötüşməyəcək", - Kirbinin sözləridir.

Türkiyə hakimiyyəti Ankaradakı terror aktını Kürdüstan Fəhlə Partiyası (PKK) üzvlərinin törətdiyini güman edir, - ölkənin daxili işlər naziri Əli Yerlikaya bildirib. O aydınlaşdırıb ki, terrorçuların şəxsiyyətinin müəyyənləşdirilməsi prosesi davam edir.

"Hərəkət tərzi hücumun böyük ehtimalla PKK tərəfindən həyata keçirildiyini göstərir. İdentifikasiya tamamlandıqdan və digər sübutlar aydınlaşdıqdan sonra daha konkret məlumatları sizinlə paylaşacağıq", - o deyib.

+++

Ankarada terror aktı nəticəsində ölənlərin sayı 5-ə çatıb, daha 22 nəfər yaralanıb, - Türkiyə Daxili İşlər Nazirliyinin rəhbəri bildirib.

+++

Ankarada naməlum şəxslərin TUSAŞ aerokosmik şirkətinin binasının girişində törətdiyi partlayış və atışma nəticəsində azı 4 nəfər ölüb, 14 nəfər yaralanıb. Bu barədə Türkiyənin daxili işlər naziri Əli Yerlikaya bildirib. O, hücumu terror aktı kimi qiymətləndirib.

Türkiyənin NTV telekanalı xəbər verir ki, hücum edənlər TUSAŞ-ın binasına günün ortasında adi taksi ilə gəliblər. Onlar silahlarını çıxararaq binaya daxil olmaq istəsələr də, mühafizə dəstəsi onların qarşısını kəsib, bundan sonra partlayış baş verib. Ehtimallara görə, kamikadze özünü partladıb.

Binanın içərisində atışma ola biləcəyi xəbər verilirdi. Təhlükəsizlik qüvvələri və təcili yardım maşınları cəlb olunub, ərazi mühasirəyə alınıb. İşçilərə sığınacaqlarda gizlənmələri tapşırıldığı bildirilir. Lakin media terrorçuların binadakı insanları girov götürə biləcəyini yazırdı. Neçə terrorçunun olduğu açıqlanmır.

Daxili işlər naziri Yerlikaya polisin hücum edənlərdən ikisini öldürdüyünü bildirib.

TUSAŞ böyük səhmdar cəmiyyətidir. Şirkət həm mülki, həm də hərbi məqsədlər üçün təyyarələr, helikopterlər, pilotsuz uçuş aparatları, kosmik peyklər işləyib hazırlayır və istehsal edir.

Avropa İnsan Hüquqları Məhkəməsi (AİHM) "Azad Avropa Radiosu/Azadlıq Radiosu MMC və Andrey Şarıy Rusiya Federasiyasına qarşı" 19659/21 nömrəli məhkəmə işi üzrə qərarını açıqlayıb. Məhkəmə çəkişməsi Rusiya hakimiyyətinin AzadlıqRadiosunu "xarici agent" elan etməsindən qaynaqlanmışdı. Yekdilliklə radionun lehinə qərar çıxaran AİHM Rusiya hakimiyyətinin Avropa İnsan Hüquqları Konvensiyasının söz və toplaşma azadlıqları ilə bağlı maddələrini pozduğunu bildirib. Məhkəmə qərarına əsasən, Rusiya AzadlıqRadiosuna dəyən maddi zərərə görə 955 min 440 avro və qeyri-maddi xərclərə görə 850 avro cərimə ödəməlidir.

Məhkəmə çəkişməsinin tam mətni qurumun saytında dərc edilib.

Qərarda deyilir ki, Rusiyanın "xarici agentlər" haqqında indiki qanunu QHT-lərin iş şəffaflığının artırılmasına xidmət etmir. Əksinə, damğalayıcı olmaqla yanaşı, yanlışlıqlara yol açır, çox geniş və qeyri-dəqiq yozulur, bütövlükdə cəzalandırmağı hədəf götürüb.

Qərarda "xarici agent"lərin hazırladığı materialın Rusiya hakimiyyətinin tələbi ilə müvafiq işarə ilə damğalanması məsələsinə də ayrıca yer verilib. AİHM-in qənaətinə görə, bu və ya digər məhdudiyyətlər demokratik cəmiyyətin təməl prinsiplərini laxladır.

Moldovada Aİ referendumunda "hə" deyənlər cüzi fərqlə qalib gəlib. Bülletenlərin 99.68 faizi sayılandan sonra moldovalıların 50.45 faizinin Aİ-yə “hə” dediyi bəlli olub. Amma bu, heç də avropapərəst Maya Sandunun istədiyi nəticə deyil.

Sandu isə prezident seçkisində 42 faizlə rəqiblərindən önə çıxıb, keçmiş baş prokuror Aleksandr Stoyanoqlo 26 faiz səs yığıb.

+++

Artıq bülletenlərin azı 98 faizi sayılıb, Maya Sandu səslərin 41 faizindən, Aleksandr Stoyanoqlo isə 26 faizindən çoxunu qazanıb.

Referendumun nəticələrində fərq getdikcə azalır, sayılan bülletenlərə görə, avrointeqrasiyaya 50.1 faiz "yox", 49.9 faiz "hə" deyib.

+++

Moldovada Avropa İttifaqına (Aİ) potensial üzvlüyə dair referendumunda "yox" cavabı üstünlük təşkil edir. Bu, avropapərəst prezident Maya Sandu və onun Qərb müttəfiqlərinə zərbə sayılır.

Referendum kampaniyasına Rusiyanın müdaxiləsinə dair iddialar var.

Sandu oktyabrın 21-nə keçən gecə bəyanatında deyib ki, səsvermə "kriminal" qrupların "görünməmiş" hücumu şəraitində keçib, onlar demokratik prosesə zərbə vurmaqdan ötrü yüz minlərlə səsi satın almağa çalışıblar.

Oktyabrın 20-də referendumla paralel keçirilən prezident seçkisində Sandu 11 digər namizəddən önə çıxıb. Ancaq o, rusiyapərəst sosialist Aleksandr Stoyanoqlodan az fərqlə öndədir, görünür, ikisi gələn ayın əvvəlində ikinci turda mübarizə aparacaqlar.

Bir çox müşahidəçilər Moldovada qoşa səsverməni ölkənin gələcək istiqamətinin müəyyənləşdirilməsi baxımından kritik sayırdılar. Yəni, ölkə daha çox Avropa və Qərbə yaxınlaşacaq, yaxud Rusiyaya yönlənəcək.

Aİ referendumunda mənfi cavab ölkənin şərq-qərb bölgüsündəki yerinin hələ müəyyənləşdirilmədiyi deməkdir. Kişinaunun Qərb dəstəkçiləri Rusiyanın bu kiçik Avropa ölkəsinə təsirindən narahatdırlar və bu narahatlıq hələ tezliklə aradan qalxana oxşamır.

Bülletenlərin 90 faizi sayılandan sonra referendumda 53.8 faizin "yox" dediyi açıqlanıb. Seçici iştirakçılılığı 50 faizə yaxın olub, bu isə referendumun baş tutması üçün tələb olunan 33 faizlik həddən yuxarıdır.

Tam ilkin nəticələr oktyabrın 21-də yerli vaxtla səhər 10-da açıqlanmalıdır.

Referendumda "yox" cavabı Aİ-yə gələcək üzvlüyü tam istisna etməsə də, Sandu və qərbpərəst müttəfiqlərə ciddi zərbə sayılır.

Sandu isə prezident seçkisində 37, Stoyanoqlo 28 faiz səs yığıb. Moldovanın ikinci böyük şəhəri Beltsının keçmiş populist meri Renato Usatıy 14 faizə yaxın səs yığa bilib.

Seçkinin ikinci turu noyabrın 3-də keçiriləcək.

ABŞ İsrailin İrana qarşı hazırladığı cavab hücumu ilə bağlı planının əks olunduğu məxfi kəşfiyyat sənədlərinin sızdırılmasını araşdıracaq. Bu barədə ABŞ Nümayəndələr Palatasının sözçüsü oktyabrın 20-də deyib.

15-16 oktyabra aid sənədlər ayın 19-da Teleqram sosial şəbəkəsində dərc edilib.

Sənədlər "tam məxfi" qeydi daşıyır, onların yalnız ABŞ və yaxın müttəfiqləri olan Avstraliya, Kanada, Yeni Zelandiya və Böyük Britaniya üçün nəzərdə tutulduğu yazılıb, - CNN bildirir.

Orada İsrailin İrana qarşı böyük ehtimalla keçirəcəyi hərbi hazırlıqlar təsvir edilir.

Sənədlərin birində onun ABŞ-ın Milli Geokosmik-Kəşfiyyat Agentliyi (NGA) tərəfindən hazırlandığı yazılıb.

Palatanın Luiziana ştatından olan respublikaçılar partiyasının nümayəndəsi Mayk Conson (Mike Johnson) hazırda araşdırma aparıldığını CNN-ə müsahibəsində təsdiqləyib.

Pentaqon sənədləri nəzərdən keçirdiyini bildirib. Adıçəkilən agentlik isə, hələlik, heç bir şərh verməyib.

"The New York Times"ın məlumatına görə, ABŞ rəsmiləri sızmanın mənbəyini müəyyənləşdirməyə çalışır. Sənədlərdə hərbi təlimlər, silahların yerləşdirilməsi və dəyə biləcək ziyan barədə məlumatlar yer alıb.

"Orada yaxın günlərdə İsrailin İrana endirəcəyi mümkün zərbə barədə təəssüratlar yer alıb. Onlar peyk təsvirlərinin təhlili əsasında hazırlanıb", - "The New York Times" söyləyir.

Bir çox hökumət rəsmiləri və müşahidəçilər deyirlər ki, İranın bu ayın əvvəli vurduğu raket zərbəsinə cavab olaraq İsrail ona zərbə endirə bilər. İran isə həmin zərbənin İsrailin daha öncəki hücumuna cavab olduğunu deyir.

Rəsmilər "The New York Times"a deyiblər ki, sızdırılan sənədlər rəsmi Vaşınqtonun İsrailin planlarına dair bilgisinin hərtərəfli qiymətləndirməsi deyil. Onlar sadəcə təhlilçilərin peyk təsvirləri əsasında gələ biləcəyi qənaətdir.

Rusiyada 2024-cu ilin birinci yarısı 52 adama vətənə xəyanət hökmü oxunub. Bu, 2023-cü ilin analojı dövrü ilə müqayisədə 3.5 dəfə çoxdur. Bu barədə Rusiya Ali Məhkəməsinə istinad edən "Vajnıye istorii" yazır.

Son doqquz ildə bir il ərzində belə göstəricilər müşahidə olunmayıb. Misal üçün, 2023-cü il ərzində bu maddə üzrə 39 nəfər cəzalandırılıb.

2023-cü ildə bu maddəyə görə cəza sərtləşdirilib, indi ömürlük həbs cəzası nəzərdə tutulur.

Həmçinin casusluğa görə məhkum olanların sayı artıb. Nəşrin məlumatına görə, 2024-cü ilin ilk yarısında bu maddə ilə 18 nəfər məhkum edilib. Bu, ötən ilin eyni dövrü ilə müqayisədə doqquz dəfə çoxdur.

Daha iki nəfərə xarici dövlətlərlə məxfi əməkdaşlığa görə hökm oxunub. "Məxfi" əməkdaşlığa görə 8 ilə qədər həbs və cərimələr nəzərdə tutulur. Düzəliş müəllifləri "əməkdaşlığın" mahiyyətini bulanıq təsvir ediblər – bu, əcnəbilərlə "açıq şəkildə Rusiya Federasiyasının təhlükəsizliyinə yönəlmiş fəaliyyətə" kömək edən təmasdır. Ən çox rast gəlinən ittiham "Ukrayna ilə əlaqə"dir.

"Sever.Realii" saytının məlumatına görə, natamam iki il ərzində Rusiyada bu maddə ilə azı 40 cinayət işi açılıb.

Dövlət sirri ilə bağlı qanunsuz hərəkətlərə görə 96 nəfər məhkum edilib ki, bu da ötən ilin ilk altı ayı ilə müqayisədə təxminən iki dəfə çoxdur. Jurnalistlər qeyd edirlər ki, hökmlərin çoxalması "Dövlət sirrinin qorunması tələblərinin pozulması" maddəsinin tətbiqi ilə əlaqədardır. Maddə dövlət sirrinə nə vaxtsa girişi olan vətəndaşların Rusiyanı tərk etməsinə görə məsuliyyət nəzərdə tutur. Yeni maddə dövlət müəssisələrinin keçmiş işçiləri, mühəndislər, konstruktorlar, tərtibatçılar və istefada olan hərbi qulluqçuları əhatə edir.

ABŞ Ermənistan ilə yüksələn hərbi əlaqələri tərifləyib və Rusiyanın regiondakı "zərərli" təsirinə qarşı çıxmağa çağırıb. Bu barədə ABŞ Qərargah Rəisləri Birləşmiş Komitəsinin sədri general Çarlz Braun (C.Q. Brown) Ermənistanın Baş qərargah rəisi Edvard Asryan ilə Vaşınqtonda çərşənbə günü görüşü zamanı söyləyib.

Görüşdə tərəflər Ermənistanın hərbi sahəsinin müasirləşdirilməsinə aid təşəbbüsləri müzakirə ediblər. Bu səylərə dəstək verilməsini təklif edən general Braun Rusiyanın regiondakı ziyanlı təsirindən narahatlıq bildirib, bu fəaliyyətə qarşı mübarizənin vacibliyini vurğulayıb.

Ermənistanın Müdafiə Nazirliyi görüşə aid yekun bəyanatda getdikcə uzaqlaşdığı müttəfiqi Rusiyanın adını çəkməyib.

Ermənistan ordusunda dəyişiklər və islahatlara dəstəyini təsdiqləyən ABŞ bu yaxınlarda Ermənistan MN-ə hərbi müşavirini təyin edəcəyini açıqlayıb.

Asryanın ABŞ-də görüşdüyü üç generaldan biri Mayk Miller (Mike Miller) xarici silahlı qüvvələrin təlim, məsləhət və təchizat məsələləri ilə məşğul qurumuna başçılıq edir.

İki ölkənin hərbçiləri iyulda Ermənistanda bu il artıq ikinci birgə təlimlər keçirib. Birgə sülhməramlı əməliyyatlara aid təlimləri ölkəyə səfər edən üç amerikalı general izləyib.

Rəsmi Moskva Rusiya-Ermənistan münasibətlərinin pişləşməsi fonunda keçirilən təlimləri pisləyib. Onlar bu təlimlərin iki ölkə münasibətlərinə növbəti zərbəni vuracağını deyib. Həmçinin əlavə ediblər ki, bununla Ermənistan öz təhlükəsizliyini daha böyük risk altına atır.

Baş nazir Nikol Paşinyan fevralda ölkəsinin Rusiyanın aparıcı rol oynadığı Kollektiv Təhlükəsizlik Müqaviləsi Təşkilatındakı üzvlüyünü dondurub. O, Ermənistanın hərbi alyansı tərk edəcəyini dəfələrlə söyləyib.

Ermənistanda hüquq-mühafizə orqanları Gümrünün keçmiş meri Samvel Balasanyan barəsində həbs orderi çıxarıb. Təxminən bir il öncə hakim "Mülki müqavilə" partiyası Balasanyannın siyasi partiyası ilə hakimiyyəti paylaşma sazişindən çıxıb.

İstintaq Komitəsi 2014-cü ildə Balasanyan ailəsinin bələdiyyə torpağını qanunsuz özəlləşdirdiyini deyir, o da bu iş çərçivəsində ittiham olunan beşinci şəxsdir. Digər şübhəlilər arasında onun oğlu Xaçatur, Gümrünün indiki merinin müavini Suren Canoyan da var. Onların hər ikisi ev dustaqlığındadır.

Balasanyanın oğlu keçən həftə Yerevanın "Zvartnots" aeroportunda, ABŞ-də müalicə aldığı deyilən atasının yanına gedərkən saxlanılıb,

S.Balasanyan hakimiyyətdən sui-istifadə və çirkli pulların yuyulmasında ittiham olunur.

Onun vəkili ittihamı şərh etməyib.

Gümrünün indiki meri Vardqes Samsonyan və 70 yaşlı keçmiş merin digər siyasi müttəfiqləri də cinayət təqibi barədə susurlar.

Varlı biznesmen olan Balasanyan 2012-ci ildə Gümrünün meri seçilib. O, 2021-ci ildə növbəti dəfə namizədliyini verməsə də, adını daşıyan blok bələdiyyə seçkilərinə gedərək səslərin çoxunu qazanıb. Ancaq mer seçimini aparan yerli şurada çoxluğu əldə edə bilməyib.

"Balasanyan Bloku" hakim "Mülki müqavilə" ilə birləşərək Balasanyanın qohumu Samsonyanı mer vəzifəsinə gətirə bilib. Qarşılığında "Mülki müqavilə"dən iki nəfər merin müavinləri olub.

Ancaq baş nazir Nikol Paşinyan dekabrda hakimiyyətin bölüşdürülməsi sazişindən çıxdığını gözlənilmədən elan edəndə onlar da vəzifədən gediblər. "Mülki müqavilə" bildirib ki, kölgə idarəçiliyinin bir hissəsi olmaq istəmir, bununla da Balasanyanın hələ də şəhəri idarə etdiyinə eyham vurub.